Në sheshin përballë shtëpisë së kulturës në Bujanoc, sot me fillim prej orës 12 është mbajtur protesta gjithë-popullore me moton "Edhe unë jam terrorist", kundër arrestimit të tetë shqiptarëve nga xhandarmeria serbe. Me mijëra shqiptarë sot ishin tubuar për t'i thënë "Stop arrestimeve" kundër shqiptarëve në Luginë të Preshevës. Duke mbajtur flamuj shqiptar, amerikan dhe parulla si "Stop dhunës", "Nuk jemi terrorist" dhe duke brohoritur emrat e të gjithë të arrestuarve në Komunën e Bujanocit. Para se të organizohej protesta, u mbajt seanca e tre Kuvendeve të këshilltarëve shqiptar të të tre kuvendeve, ku njëzëri u kërkua lirimi i menjëhershëm i të arrestuarve, respektimi i plotë e amnistisë së ish pjesëtarëve të UÇPMB-së si dhe iu bë apel gjithë shqiptarëve të Luginës që nesër sa më masovikisht të dalin në zgjedhjet lokale. Ndërkohë kryeministri Sali Berisha ka dënuar arrestimet keqtrajtimet, bastisjet e shqiptarëve në Luginën e Preshevës, ditën e heshtjes elektorale. "Janë një akt terrori policesk, me qëllime të ulëta politike",-thuhet në njoftimin zyrtar. Ndërkohë mbrëmë edhe Qeveria e Kosovës e ka dënuar aktin e ulët të arrestimit të qytetarëve shqiptarë në Komunën e Bujanocit. Qeveria vlerëson se këto veprime të vazhdueshme të Qeverisë së Serbisë janë edhe një provokim i rëndë kundër paqes dhe stabilitetit në rajon. Ndërkohë as Bashkimi Evropian e NATO deri më tani nuk ka pranuar zyrtarisht të prononcohet për arrestimet e fundit, të cilat janë bërë në Luginën e Preshevës. Në aksionin e djeshëm policor, xhandarmëria serbe vuri në pranga 8 shqiptarë, pesë prej të cilëve nën akuzën për krime lufte në Kosovë. Ministri serb i Punëve të Brendshme Ivica Daçiq, tha se personat në fjalë janë vënë në pranga për shkak se kanë kryer krime luftë në Luginë të Preshevës. Arrestimi i këtyre personave erdhi vetëm dy ditë pasi që në Prishtinë u mor vendimi për lirimin e Fatmir Limajt dhe pasi që Daçiq ishte kërcënuar se do ta arrestojë secilin që ka bërë krime lufte. Alsat-M
