Komiteti i Helsinkit (KH)vlerëson se Ministria e Brendshme me akuzat që u bëri të arrestuarve në aksionin policor 'Monstrum', tenton të kryejë presion në gjyqësor. Kryetari i Komitetit të Helsinkit Gordan Kallajxhiev, tha me këtë rast se nuk është standard evropian që policia t'i fajëson të arrestuarit para se ata të dalin para gjykatës.
"Po kjo është presion. Ekzistojnë standarde, tentojmë t'i praktikojmë standardet evropiane. Gjykata Evropiane për të drejtat e njeriut, ka shumë aktgjykime për të cilat as ekzekutivi e as ndonjë përfaqësues nuk mundet në konferencë për shtyp të japë konstatime serioze se personat janë kryerës të veprës penale. Por mund të thotë vetëm se ka të dyshuar, ose bëhen hetime, pasi ajo është presion edhe ndaj gjykatës edhe mediumeve. Nga këtu të gjitha deklaratat se ka dëshmi të pamohueshme janë në kundërshtim me këto standarde të Gjykatës Evropiane për të drejtat e njeriut", tha Gordan Kallajxhiev, kryetar i Komitetit të Helsinkit.
Kallajxhiev tha se Komiteti është duke ndjekur edhe rastin e Haki Hazirit i cili për gjashtë ditë ishte i zhdukur dhe në fund u paraqit në gjykatë për t'u dërguar më pas në paraburgim. Sipas Kallajxhievit ky rast i ngjason atij të Sopotit.
"Ne do të dalim me një analizë se këto raste të vendosjes së të dyshuarve në situatë të dëshmitarit të mbrojtur, në sistemin tonë shkaktohen rreziqe për presion ndaj të dyshuarve që të bashkëpunojnë me policinë. Mund të paramendoni se e kishim edhe rastin e Sopotit kur na ndodhi një situatë sikur tash me dëshmitarin e mbrojtur, pikërisht ky dëshmitari që ishte kyç dhe përgjegjës. Këto procedura nga njëra anë janë domosdoshme nga tjetra anë tregojnë se tek ne nuk kemi ndërtuar mekanizma të mirëfilltë që do të parandalojnë të keqpërdoren", u shpreh Gordan Kallajxhiev, kryetar i Komitetit të Helsinkit.
Kallajxhiev duke shpjeguar raportin vjetor të Komitetit të Helsinkit, përmendi disa nga vërejtjet mes të cilave edhe diskriminimin, presionin ndaj gjykatave, tejkalimin e kompetencave të policisë si dhe fjalorin e urrejtjes që ishte i theksuar gjatë vitit të kaluar. Shkëlzen Aqifi
