Problemi me marrjen e diplomave në Universitetin Shtetëror të Tetovës nuk mund të zgjidhet sa hap e mbyll sytë, siç tha dje zëdhënësi i këtij institucioni Selam Sulejmani. Këtë e dëshmoi sërish sot Jakup Kamberi, prindi i studentit Kadri Kamberi i diplomuar një vit më parë, i cili për arsye të panjohura diplomën nuk mund ta merr akoma. Dje për Alsat ai sqaroi se djali i tij tani më një vit ballafaqohet me probleme të shumta rreth marrjes së diplomës. Jakup Kamberi, pas deklaratës së djeshme të zëdhënësit të USHT-së, sot sërish i ishte drejtuar institucionit në fjalë për të marrë diplomën. Por edhe përkundër apelit të zëdhënësit të USHT-së, ai madje as nuk u lejua që të hyjë në këtë institucion.
"Ata thanë dje se ne I japim diplomat hap e mbyllë sytë, unë erdha sot prapë te Universiteti i Tetovës edhe të administratorët. Ata thanë nuk është faji jonë po duhet të shkosh te sekretari. Shkova te sekretari ata nuk më lan të hyj brenda se dikush paska mysafir. Unë ju kërkoj falje administratorëve se këtu nuk qenka problem I administratorëve po qenka problem I rektorit dhe ministrisë. U bëj apel të gjithë studentëve të cilët nuk I kanë marrë diplomat të më përkrahin dhe të shohin se qysh punohet në USHT", deklaroi Jakup Kamberi, prindi i studentit të diplomuar.
Ndërkohë, dje zëdhënësi i USHT-së Selam Sulejmani dje para opinionit tha se nuk ka problem të kësaj natyre në këtë institucion. Madje ai shtoi se procedurat për marrjen e diplomës nuk tejkalojnë afatet e parapara me ligj. Të rikujtojmë edhe një herë se çfarë pati deklaruar zëdhënësi Sulejmani.
"E para punës, kjo nuk ndodh. Universitetet kanë këtë mision studentët që përfundojnë studimet e tyre më në fund pas kalimit të të gjitha procedurave ligjore të parapara nga ligji për arsim të lartë në Maqedoni më në fund të pajisen me dokumentin e tyre final, diplomën e Universitetit. Procedurat për të marrë diplomë në USHT, zgjasin aq sa e parasheh ligji për arsim të lartë në Maqedoni . Mua më vjen keq për rastin në fjalë por nëse vlerëson se ka ankesa ka shkelje sic e vlerëson ai le të paraqitet në hapësirat e USHT-së, dhe problem mbyllet sa hap e mbyll syt", tha ditë më parë Selam Sulejmani, zëdhënës I USHT-së.
Për shkak të mungesës së diplomës nga USHT-ja, Kadri Kamberi nuk mund t'i vazhdojë studimet pos-diplomike në Gjermani. Ndryshe, në bazë të informacione që ka siguruar Televizioni Alsat M, Kadri Kamberi është vetëm një nga shumë studentë të tjerë, të cilët prej vitesh ballafaqohen me vonesat e diplomave. Melihate Rustemi
