Ndërprerja e linjës hekurudhore Shkup-Selanik prej disa ditësh, ka ardhur si rezultat i një incidenti të ndodhur në afërsi të Selanikut -- përmbysjes dhe daljes nga shinat të disa vagonëve të mallrave. Kështu njoftoi zëdhënësi i qeverisë Aleksandar Gjeorgjiev. Shkupi zyrtar ka ofruar ndihmë në tejkalimin e kësaj situate përmes të gjitha instancave duke përfshirë edhe mënyrën diplomatike përmes Ministrisë së Jashtme, por deri më tani pala greke nuk është kundërpërgjigjur. Nga Athina kanë njoftuar se situata do të tejkalohet shpejt, por që nga aksidenti kanë kaluar tashmë 8 ditë.
"Sipas informatave tona, para 7-8 ditësh në linjën hekurudhore ka ndodhur një incident ku janë përmbysur disa vagonë.... Ne jemi në komunikim me Greqinë dhe kemi ofruar ndihmë për kapërcimin e kësaj situate. Jemi drejtuar zyrtarisht në mënyrë diplomatike përmes Ministrisë së Jashtme. Ndihma është ofruar edhe nga ana e ministrisë së transportit dhe lidhjeve dhe 'Hekurudhat e Maqedonisë'. Deri në këtë moment nuk kemi përgjigje nëse kanë nevojë për ndihmën tonë, vetëm kemi marrë njoftim se në shumë shpejt ky problem do të tejkalohet dhe komunikacioni hekurudhor do të normalizohet", tha Aleksandar Gjeorgjiev zëdhënës i qeverisë.
Në njoftimin nga pala greke, siç informoi Gjeorgjiev thuhet se po merren masat e nevojshme për tejkalimin e problemit. Treni sezonal mes dy vendeve u vendos si rezultat i marrëveshjes së arritur mes Hekurudhës së Maqedonisë dhe asaj Greke. Linja sezonale Shkup -- Selanik -- Shkup qarkullonte gjatë fundjavave dhe pritet të zgjasë deri më 30 shtator. Gjyltene Rexhallari
