Përfaqësimi i drejtë dhe adekuat i shqiptarëve në Ushtrinë e Maqedonisë do të jetë në qendër të axhendës euro-atlantike të Ministrisë së Mbrojtjes. Në një takim me gazetarë, numri 'një' i këtij dikasteri Fatmir Besimi, njoftoi se përfaqësimi i shqiptarëve në Ministrinë e Mbrojtjes aktualisht është 16,6 për qind ndërkaq në ARM, 18,7 për qind. Gjithashtu përfaqësimi sa i përket ushtarëve profesionist është 21 për qind ndërsa oficerë janë 10 për qind. Besimi tha se në këtë kuadër ka qenë edhe konkursi i fundit për pranimin e 12 kandidatëve shqiptarë në Akademinë Ushtarake nga gjithsej 25 kandidatët. Duke komentuar reagimet që vijuan në opinion se kandidatët nuk janë përzgjedhur sipas cilësisë, Besimi tha se procedura është kryer në përputhje me ligjin për akademinë ushtarake dhe parimit për përfaqësimin e drejtë dhe adekuat të bashkësive jo shumicë. Ai tha se deri ani, askush nuk është ankuar pranë dikasterit të tij, edhe pse siç tha ai, çdokush ka të drejtë ta bëj këtë. Besimi mohoi që në dikasterin e tij të jetë ngritur procedurë disiplinore për 4 ushtarët që morën pjesë në aktin e nderimit të monumentit të UÇK-së në Sllupçan. Numri 'një' i mbrojtjes Fatmir Besimi paralajmëroi se arritja e standardeve të NATO-s dhe anëtarësimi në Aleancë do të jenë fokusi kryesor i këtij dikasteri në periudhën e ardhshme për të cilën siç njoftoi ai, nesër në Bruksel do të diskutojë edhe me Sekretarin e Përgjithshëm të Aleancës Veri Atlantike, Andres Fog Rasmusen. Semra Jakupi
