Në Sllupçan të Komunës së Likovës, tek varrezat e dëshmorëve në mënyrë solemne u përurua muzeu i dëshmorëve të ish UÇK-së. Në këtë muze janë ekspozuar uniformat, pjesë nga armatimi dhe pajisje tjera të cilët dëshmorët i kanë përdorur gjatë konfliktit të vitit 2001. Hapja e muzeut të dëshmorëve, u bë në kuadër të manifestimeve për shënimin e 100 vjetorit të pavarësisë së Shqipërisë. Kryetari i BDI-së Ali Ahmeti tha se hapja e këtij muzeu të dëshmorëve, është një moment i veçantë i përjetësimit të veprave të ish UÇK-së.
"Është moment tepër i veçantë, ditë simbolike, ku po përjetësohet e madhështohen gjurmët e pashlyeshme që la UÇK-ja të çelikosura në një muze që duket i vogël, por ka shpirt të madh ka domethënie të madhe dhe ka porosi të mëdha për gjenerata që do vijnë pas nesh dhe me fanatizmin më të madh janë gjurmët e pashlyeshme, historia më modern,e historia më e re e shqiptarëve të Maqedonisë", Ali Ahmeti, kryetar i BDI-së.
Kryetari i Komunës së Likovës Sadulla Duraku tha se UÇK-ja nuk ishte ushtri uzurpatore, por kërkonte hisen e shqiptarëve dhe demokratizimin e vendit.
"Ishte ushtri çlirimtare që ua dha mendjen të gjithë të tjerëve, edhe popullatës tjetër që i kemi fqinj që të demokratizojë këtë vend dhe e vërteta është se në këtë vend jetojnë shqiptarët që e duan hisen e vet dhe hisen e vet askush nuk ta fal, por e fiton, ne do ta fitojmë së bashku me gjeneratën e re", tha Sadulla Duraku, kryetar i Komunës së Likovës.
Sipas organizatorëve të ndërtimit të muzeut të dëshmorëve, i njëjti ka kushtuar rreth 16 mijë euro, ndërsa është ndërtuar me mjete të sigluara nga donatorët. Shkëlzen Aqifi
