LSDM-ja opozitare hapi në sheshin 'Maqedonia' shtabin e kandidatit të saj për kryetar të Shkupit Jani Makraduli. Në solemnitetin e hapjes së këtij shtabi, aktivistja e kandidatit të opozitës së bashkuar, Nora Shakiri me fjalimin e saj para qindra qytetarëve dhe funksionarëve të LSDM-së e përloti Makradulin.
"Kandidatura jote Jani ndodhi në një nga ditët më të mëdha të pjesëtarëve të islamit, Kurban Bajramit, mediumet e tyre, tërë ditën flisnin kështu:'Jani kurban për Shkupin, Jani viktimë për Shkupin. Nëse e dinin se çka do të thotë ajo, nuk do të flisnin ashtu, por aq dinë sepse aq kanë njohuri. Po, Jani Makraduli është viktimë për Shkupin, për Shkup më të mirë, Evropian dhe të shëndetshëm. Nëse Kurban Bajrami të solli kandidaturën për kryetar të Shkupit, beso mik, se Shën Nikolla do ta sjell fitoren në mars këtu", tha Nora Shakiri, aktiviste e Jani Makradulit.
"Ju thërras të bashkoheni, të bashkoheni në fitoren e përbashkët për Shkupin, tani kur më së shumti i duhet qytetit tonë, tani kur Shkupin të cilin e duam, tenton të mbijetojë. Tani kur luftojmë të mbijetojë dhe fitojë demokracia. Bashkëngjituni vizionit të përbashkët ku ideja ka përparësi para ideologjisë, vizioni i cili zgjedh ardhmërinë, pa humbur kohë për debate për të kaluarën, vizion që do të fitojë banalitetin e sotëm, vizion i bazuar në vlera të përjetshme e jo për ndonjë funksion ose fotografi, vizion për shumë gjelbërim e aspak barok ", deklaroi Jani Makraduli, kandidat i LSDM-së për qytetin e Shkupit.
Kryetari i LSDM-së Branko Crvenkovski tha se LSDM-ja fitoren e saj në qytetin e Shkupit do ta festojë në shtabin që sot e promovuam të Jani Makradulit.
"Edhe unë jam për Janin për shkak se jam banor i këtij qyteti dhe dua të kem kryetar me të cilin do të krenohemi, e jo kryetar me të cilin do të qeshim dhe do të tregojmë barcoleta në llogari të tij. Për këtë arsye Jani le të jetë ky shtab vend ku do të përgatitet fitorja jote dhe e jona, le të jetë ky vend për të gjithë shkupjanët që dëshirojnë Shkup më të mirë dhe është i gatshëm të luftojë për Shkup më të mirë , le të jetë ky shtab vendi ku do ta kumtojmë dhe festojmë fitoren për Shkupin tonë", tha Branko Crvenkovski, kryetar i LSDM-së.
Jani Makraduli për qytetin e Shkupit kundërkandidat do të ketë kryetarin aktual Koce Trajanovskin nga VMRO DPMNE-ja. Shkëlzen Aqifi
