Një aksident automobilistik ka ndodhur pasditen e sotme në vendin e quajtur kryqëzimi "Kapelja" në rrugën At Kristo Negovani, në qytetin e Vlorës. Një furgon pasagjerësh është përplasur me një furgon mallrash dhe për pasojë kanë mbetur 16 persona të plagosur, të cilët janë dërguar menjëherë në spitalin e Vlorës.
Sipas policisë së Vlorës furgoni me targë VL 9192 C i cili transportonte 16 persona, punëtorë të bobinazhit të elektrikut në Oshtimë të Vlorë është përplasur me mjetin tjetër me targë AA 593 CZ në të cilën transportoheshin mallra.
16 të lënduarit janë transportuar menjëherë në spital për ndihmë mjekësore e tani janë nën vëzhgimin e mjekëve. Bluzat e bardha sqarojnë se si pasojë e përplasjes janë lënduar tre persona rëndë, të cilët kanë marrë dëmtime në pjesë të ndryshme në trup e në kokë. Ndërkohë gjashtë pasagjerë kanë pësuar fraktura në gjymtyrë, kurse 7 të tjerët janë lënduar më lehtë, por vijojnë të kurohen në spitalin rajonal të Vlorës.
Mjeku Besnik Elezi në spitalin rajonal të Vlorës thekson se të lënduarit e kanë kaluar rrezikun për jetën, por kanë nevojë për kurim mjekësor.
Ende nuk janë sqaruar shkaqet e aksidentit, por policia ka mbërritur në vendin e ngjarjes dhe dyshon se aksidenti ka ndodhur për shkak të shpejtësisë tej normave të lejuara me të cilën po lëviznin të dy mjetet e aksidentuara.
