Propozim ndryshimet e Kodit Penal, që kanë të bëjnë me dënimin e huliganëve sportivë, kanë hyrë në procedurë parlamentare. Në diskutimin për nevojën e ndryshimeve të tilla në Komisionin parlamentar për Sistem Politik, vëmendja më e madhe u përqendrua në sanksionet e reja që parashikohen për incidentet në terrenet sportive. Propozimin e Qeverisë e mbështeti edhe PDSH-ja opozitare, e cila vlerëson se ligjet e tilla po zbatohen në mënyrë të një anshme, duke goditur vetëm shqiptarët.
"Më e keqja e këtij Kodi Penal është zbatimi i saj. Edhe të mëhershmëve, për shkak se këto janë bërë në mënyrë selektive. Kur bëhet fjalë për tifozët shqiptarë menjëherë merren masa, ndërsa kur bëhet fjalë për tifozët maqedonas nuk ka aktor konkret, por këto janë vetëm paraqitje" , deklaroi Gazmend Aliu, PDSH.
Zv/ministrja e Drejtësisë Biljana Brishkovska -- Boshkovski mohoi se cilido ligj i Republikës së Maqedonisë zbatohet në mënyrë të një anshme, duke theksuar se të gjithë qytetarët janë të barabartë para ligjit.
"Ligjet në Republikën e Maqedonisë nuk njohin dallime fetare, racore apo etnike. Të gjithë qytetarët e Maqedonisë janë të barabartë para ligjeve dhe para institucioneve para të cilave eventualisht do të ngrihej procedurë për përgjegjësi penale", tha Biljana Brishkovska -- Boshkovski, zv/ministre e Drejtësisë.
Deputetja e BDI-së Suzana Saliu vlerëson se ndryshimet në kodin penal, do të kontribuojnë për ruajtjen e marrëdhënieve të mira ndëretnike dhe zvogëlimin e incidenteve.
"Dhuna, rrahjet, nxitja e urrejtjes ndërnacionale janë dukuri të shpeshta edhe në terrenet sportive të Republikës së Maqedonisë, madje mendoj se asgjë nuk i trondit ato marrëdhënie ndëretnike sikur paraqitja emotive të tifozëve, pa marrë parasysh se në cilën anë janë ato tifozë. Prandaj mendoj se ashpërsimi i sanksioneve do të ndikojë dukshëm në zvogëlimin e këtyre paraqitjeve agresive në terrenet sportive", u shpreh Suzana Saliu, BDI.
Propozim ndryshimet e Kodit Penal parashohin që personi i cili malltreton tjetrin, fyen, cenon sigurinë e tij apo ushtron dhunë të ashpër ndaj një personi tjetër, do të sanksionohet penalisht dhe do të përballet me dënim me burg në kohëzgjatje prej 6 muaj deri në 5 vjet. Nëse gjatë kryerjes së dhunës së ashpër ndonjë person merr lëndime të rënda trupore apo vdes, atëherë parashihet dënim nga 3 deri në 10 vjet burg. Benjamin Arifi
