Debati mes ministrit të mbrojtjes Talat Xhaferit dhe drejtuesit të 'Dinjitetit' Stojanço Angellov në emisionin 'Rruga Drejt' në ALSAT-M ka zgjuar interesim të jashtëzakonshëm dhe ka arritur shikueshmëri rekorde. Debati i mbrëmshëm ishte temë kryesore në të gjitha mediat vendore, veçanërisht tek ato në gjuhën maqedonase.
Sipas statistikave, emisioni 'Rruga Drejt' ka thyer të gjitha numrat e shikueshmërisë.
Mesazhet e Ministrit Xhaferi dhe kryetarit të 'Dinjiteti' Stojanço Angellov mbrëmë u transmetuan pothuajse nga të gjitha televizionet kombëtare dhe lokale si dhe në të gjitha portalet informative.
Një ndër titujt më të përdorur, gjegjësisht momenti nga i cili dolën pothuajse të gjitha kokat e lajmeve ishte momenti kur Ministri Xhaferi dhe gjenerali Stojanço Angellov shtrënguan duart njëri-tjetrit dhe u përshëndetën në fund të emisionit.
'Stojançe Angellov dhe Talat Xhaferi shpërthyen në ALSATM', ishte një nga paralajmërimet më të spikatura nga mediat në vend.
Disa portale cituan edhe pjesën e debatit kur Xhaferi i thotë Angellovit se për fat të keq ose për fat jo të keq, unë jam ministër i mbrojtjes, kurse ti je nën komandën time.
Ministri i mbrojtjes Xhaferri dhe kryetari i Dinjitetit Angellov, në fund të emisionit 'Rruga Drejt' dërguan mesazhe për ulje të tensioneve dhe apeluan deri tek të rinjtë që të mos bien pre e manipulimeve për të marrë pjesë në protesta të dhunshme siç ishin ato të premtes dhe të shtunës së kaluar. Valmir Kuçi
