Lideri i opozitës maqedonase Branko Cërvenvkovski i referoi personalisht sot shefit të misionit vëzhgues të OSBE/ODIHR-it, Gert Arens shqetësimet e tij lidhur me parregullsitë zgjedhore. Në takimin që zgjati rreth 30 minuta, Cërvenkovski u përqendrua kryesisht tek problemi i votuesve fiktiv, dhe rajonet ku kjo parti konsideron se mund të ndodhin parregullsitë më të mëdha në ditën e zgjedhjeve. Shefi i misioni vëzhgues të OSBE/ODIHR Gert Arens, ishte i shkurtër, dhe tha se më shumë detaje rreth procesit zgjedhor do të japë të hënën, kur do të publikohet edhe raporti nga vëzhgimi i procesit zgjedhor dhe fushatës së tyre.
"Folëm për shqetësimet që ka Cërvenkovski rreth procesit zgjedhor, por nuk dua të komentojë më shumë pasi jemi shumë afër ditës së zgjedhjeve. Të hënën do të kemi konferencë për shtyp, ku do t'i publikojmë shqetësimet tona eventuale", tha Gert Arens, Shef i Misionit Vëzhgues të OSBE/ODIHR.
Shefi i Misioni vëzhgues nuk deshi të jepte detaje edhe nëse do të ofronte numër të rritur vëzhguesish në Strugë dhe Kërçove, por tha se shpërndarjen e vëzhguesve, do të bëhet në bazë të një sistemi. Edhe vetë LSDM-ja kishte propozuar që në vendvotimet kritike, OSBE/ODHIR-i të ofrojë numër më të lartë vëzhguesish. Në tryzën e bisedimeve me Arensin, LSDM-ja shtroi sot të gjitha faktet dhe dëshmitë rreth shkeljeve të procesit zgjedhor, duke i kërkuar misionin vëzhgues, të qëndrojë dhe monitorojë me kapacitet të plotë, edhe raundin e dytë të zgjedhjeve.
"U përmendën shpërdorimet të mjeteve buxhetore në fushatën parazgjedhore, punësimet parazgjedhore që u realizuan në kundërshtim me ligjin, fillimin e parakohshëm të fushatës zgjedhore, si dhe parregullsitë në listën zgjedhore, respektivisht, paraqitjen e personave të cilët nuk kanë qenë në listën zgjedhore. Ne në vitin 2011 kishim një listë zgjedhore të fryrë e cila duhej të pastrohej, por në vend që të pastrohet, tani u ballafaquam me një situatë ku lista e 2011-ës dhe lista e tanishme ka rritje numri votuesish", deklaroi Renata Treneska-Deskovska, LSDM.
Nga LSDM-ja bënë të ditur se posedojnë edhe emrat dhe të dhënat personale të atyre që nuk kanë qenë më parë në listën zgjedhore. Semra Jakupi
