Britania e Madhe i dha lamtumirën ish-kryeministres britanike Margaret Thatcher. Mbretëresha Elizabeth dhe personalitete nga 170 vende të botës morën pjesë sot në ceremoninë mortore të ish-kryeministres britanike në vitet 1979-1990, e njohur ndryshe edhe si "Zonja e Hekurt".
Trupi i pajetë u zhvendos nga pallati Westminster drejt katedrales së Shwn Palit ndërsa rruga e gjithë itinerarit ishte e mbushur me anëtarë të forcave të armatosura. Kryeministri i vendit David Cameron bëri thirrje britanikëve të tregojnë respekt gjatë funeralit.
Ai tha se njerëzit kanë të drejtë të kenë mendime të ndryshme, por kur mbahet zi për një 87-vjeçare, e cila ishte gruaja e parë kryeministre e vendit, mendoj se është mëse e përshtatshme, që të tregohet respekt duke e vënë theksin tek reputacioni i Britanisë përpara syve të botës në zhvillimin e kësaj ceremonie.
Ish-kryeministrja e parë dhe e vetme femër në qeverinë britanike, Margaret Thatcher vdiq më 8 prill, në moshën 87 vjeçe si pasojë e trombozës.
Në një mesazh në Facebook , kryeministri Berisha shkruan se, "ndodhem në Londër ku erdha për të marrë pjesë në ceremoninë e varrimit dhe për të shprehur nderimin tim dhe të mbarë shqiptarëve për ish-kryeministren e Britanisë së Madhe, Margaret Thatcher. Lady Thatcher mbetet në histori si kryeministrja që ndryshoi më shumë vendin e vetë, por dhe botën me doktrinën e saj të bazuar në lirinë e individit, tregun e lirë dhe qëndrimin e hekurt kundër regjimeve tiranike".
"Shqiptarët dhe kombet e shtypura kanë patur tek ish-kryeministrja Thatcher miken e madhe, avokaten e pamposhtur të lirive të tyre. Në takimin tim të parë me Lady Thatcher në pranverë të vitit 1991, fjalët e para që do më drejtonte ishin; Më thuaj si po i masakron vëllezërit tuaj në Kosovë kasapi i Ballkanit, Milloshevici. Margaret Thatcher nuk jeton më, por trashëgimia e saj, theçerizmi, nuk vdes kurrë", përfundon mesazhi i kryeministrit Berisha.
Kryeministri Berisha ndodhet në Londër, në Britaninë e Madhe, ku po merr pjesë të mërkurën në ceremoninë e lamtumirës për nder të ish-kryeministres Margaret Thatcher, ceremoni kjo që mbahet në Katedralen St. Paul, dhe ndiqet nga personalitete të larta botërorë.
