Qeveria është duke hartuar një strategji se si të eksportojë sasi më të mëdha produktesh bujqësore drejt tregjeve tradicionale, por edhe drejt tregjeve të reja. Në fokus, sipas autoriteteve, do të jetë eksporti i produkteve të përpunuara bujqësore.
"Tani për tani më së shumti eksportohet duhani, vera dhe produktet e freskëta bujqësore, por qëllimi është që të kemi vlerë shtesë, pra, përmes përpunimit të arrijmë efekt më të madh në bujqësi. Pikërisht atje jemi të orientuar", tha Zoran Konjanovski, zëvendësministër i Bujqësisë.
Goran Adamçevski nga "Agbiz" shprehet se që të kënaqen tregjet e mëdha si Rusia, Kanadaja dhe vendet e Evropës së Mesme, duhet një bashkëpunim më i mirë mes bujqve dhe përpunuesve të prodhimeve bujqësore.
"Rreth sasive, planifikuesit e sektorit të marketingut, duhet të punojnë për lidhjen e përbashkët horizontale, në mënyrë që disa kompani të furnizojnë një supermarket ose zinxhir supermarketesh, ose disa eksportues frutash të ofrojnë portofol që t'u përgjigjen në mënyrë konkurrente kërkesave nga jashtë. Në këtë fushë duhet punuar shumë", deklaroi Goran Damçevski -- Agbiz.
Ministri Valon Saraçini porositi bujqit që të orientohen edhe drejt tregjeve të reja, e jo të eksportojnë vetëm në tregje tradicionale.
Sipas "Agbiz", parcelat e vogla bujqësore, lidhshmëria e dobët mes kapaciteteve përpunuese dhe bujqve, si dhe farat që nuk japin rendiment të lartë dhe cilësor, janë probleme të tjera shtesë që duhet të zgjidhen gjithashtu përmes strategjisë së re. Në vitin 2006, eksporti i produkteve bujqësore shënoi shifrat e 242 milionë euro. Vitin e kaluar në arkën shtetërore u derdhën më shumë se gjysmë miliardi euro. Verica Pavllovska
