TIRANE - Kryetari i këshilltarëve të majtë në bashki Aldrin Dalipi thotë se mbledhja e këshillit bashkiak për të marrë në shqyrtim kërkesën e shumicës në këshill (PS-LSI) për shkarkimin e Njazi Kosovrastit është caktuar për në orën 11:00.
Në një prononcim telefonik për TVA1 REPORT Aldrin Dalipi thotë se që prej së hënës u lajmërua zyrtarisht mbledhja sot në 11:00. Mbledhja është thirrur nga shumica e anëtarëve, PS- LSI me kërkesën specifike për të shkarkuar Njazi Kosovrastin për shkak të ndryshimit të raportit i cili kërkon dhe rrjedhimisht një kryetar të ri.
Dalipi informon se njoftimi për mbledhjen, bëhet nga sekretari i këshillit bashkiak, i cili i ka bërë njoftimin të gjithë këshilltarëve të PD e PS e LSI, por saktëson se ka të dhëna shqetësuese se kryetari i bashkisë mund të tentojë të mos mbledhë këshillin bashkiak dhe i bën thirrje të mos pengojë vullnetin e shumicës.
"Dua tju saktësoj se ka të dhëna shqetësuese që kryetari i bashkisë mund të mos hapë dyert e bashkisë, apo mund të tentojë të bllokojë mbledhjen e shumicës së këshillit Bashkiak. Gjej rastin ti bëjë thirrje të shohë situatën me qetesië dhe ta pranojë zbatimin e ligjit dhe vullnetin e shumicës së re. Të mos pengojë këshillin bashkiak të funksionojë në të mirë të qyetarëve. Mund të jetë problem për të që mund të mos e pranojë se s'ka shumicën. Por i bëj thirrje ta pranojë me qetësi"- thotë Dalipi.
