Qytetarët e Pustecit, sikur edhe të gjithë qytetarët e Maqedonisë në diasporë kanë të drejtë vote, dhe këtu nuk ka asgjë kontestuese. Kështu është shprehur ministrja e brendshme Gordana Jankullovska, në intervistën javore për Rsdion Evropa e Lirë. Jankullovka madje votuesit nga Pusteci i krahasoi me mërgimtarët shqiptarë të cilët u kthyen në vendlindje për të votuar në Kërçovë.
"Ato njerëz kanë të drejta dhe ato të drejta u janë të garantuara me Kushtetutë, kështu që këtu nuk ka vend për asnjë koment. Njëjtë sikur ndoshta dikujt nuk i ka pëlqyer që për vetëm disa orë, erdhën mijëra njerëz nga diaspora, para se gjithash shqiptarë etnik, vetëm për të dhënë votën e tyre në Kërçovë dhe Strugë. Megjithatë ligjet tona, rregullativa jonë e lejon këtë. Pak para zgjedhjeve, po edhe në ditën e zgjedhjeve, ato njerëz erdhën me fluturime çarter, me autobusë, dhanë votat e tyre dhe tani Kërçova dhe Struga kanë kryetarë ashtu siç i kanë", tha Gordana Jankullovska, Ministre e brendshme.
Por vet Jankullovka, një muaj më parë tha se MPB-ja nuk ka informata se banorët e Pustecit votojnë në Komunën Qendër. Në këtë intervistë, Jankullovka ka folur edhe për aksionin policor Monstra, duke thënë se policia është e gatshme për reagim të shpejtë, në rast se një gjë të tillë e kërkojnë prokuroria dhe gjykata.
"Nuk kemi marrë urdhra plotësuese, por deri në mbylljen e rastit me aktgjykim të prerë, Gjykata dhe Prokuroria mund të japin urdhër të ri për ne. Nëse japin, sikur edhe deri tani, do të reagojmë menjëherë", deklaroi Gordana Jankullovska, Ministre e brendshme.
Lidhur me ekstradimin Afrim Ismailoviqit dhe Alil Demirit nga Kosova, të dyshuar për rastin Monstra' , Jankullovska tha se procedurën për ekstradim e udhëheq Ministria e Drejtësisë, dhe sipas informatave që ajo posedon, procedura nga institucionet maqedonase është e përfunduar, ndërsa pritet përgjigje nga pala kosovare. Benjamin Arifi
