Jetojnë në një dhomë të vetme tek shtëpia e xhaxhait, një shtëpi e para 70 vjetësh, në varfëri që duket se është ulur këmbëkyq që në pragun e shtëpisë. Në këto kushte jeton familja 5 anëtarëshe Fetahu nga fshati Balindoll i Epërm. Ndihmë nuk kemi nga asnjë anë, thotë Nifka Fetahu, përveç një shoqate humanitare e cila here pas here iu dërgon ndonjë të hollë apo ndonjë qese me ushqime.
"Nuk janë në punë askush, mundohen në të zezë, djalin e kam të ri, s`na del asgjë. Siç e shihni vet këtu me një dhomë jemi. Fëmija kërkon shkollën kërkon kushte të veta por s`kemi çka bëjmë s`mund ta mbërrijmë, na ndihmojnë ndonjëherë njerëzit i bien dhurata për ditëlindje Shadies, po ne skemi mundësi më shumë. Por megjithatë më të rëndësishme e kam shtëpinë, jetoj në vend të huj me një dhomë jemi tek shpia e axhës", deklaroi Nifka Fetahu, zonja e shtëpisë.
Kësaj familje bujare, Zoti u ka falë edhe një vajzë, Shadien, e cila fatkeqësisht, është e verbër. Megjithëse në këtë gjendje, Shadija 12 vjeçare kërkon të gjejë ngjyrat e jetës në shkollën që ka nisur prej tre muajsh, atë për të verbrit. Edhe pse është një nxënëse e mire, ajo rrezikon të ndalë mësimet, për shkak të mungesës së të ardhurave. Dëshira e saj më e madhe është të ketë një kompjuter, ashtu sic dëgjon nga rrëfimet e shokëve.
"Mirë më duket në shkollë, mësojmë me makinën e Brait, mësojmë disa figura. Një kompjuter e dua", tha Shadije Fetahu.
Menjëherë pas njoftimit me këtë gjendje të familjes Fetahu nga Balindolli, Shoqata Humanitare Mëshira nga Tetova shprehu gatishmërinë të marrë përsipër iniciativën për ndërtimin e një shtëpie. Por, një iniciativë e tillë nuk mund të çohet më tej, pa ndihmën e njerëzve humane.
"Ne morëm iniciativën për t'i ndërtuar një shtëpi kësaj familje, të cilën e kemi të regjistruar në shoqatë dhe për dy vite rresht e kemi ndihmuar me gjëra ushqimore dhe mjete financiare për çdo muaj........ Gjyshi i saj i ka falë një tokë ku do ndërtohet shtëpia, pra shfrytëzojmë këtë rast që përmes Alsatit të apelojmë për ndihmë tek të gjithë qytetarët njerëz të vullnetit të mirë të cilët duan, ta ndihmojnë këtë familje, sidomos këtë fëmijë që ka nevojë për ndihmën e popullit", tha Haki Lushtaku, menaxher i SH. H. 'MËSHIRA'.
Njerëzit dashamirë mund të kontaktojnë familjen ose shoqatën 'Mëshira', për sadopak ndihmë që kanë mundësi. Cdo dhuratë apo donacion e tyre, është një buzëqeshje më shumë për familjen Fetahu. Bashkim Sulejmani
