Të rinjtë duan të punojnë por nuk kanë qasje serioze, nuk janë të përgatitur dhe nuk kanë praktikë të mjaftueshme. Kështu pronarët i profilizojnë të rinjtë e sotëm të cilët kërkojnë punë. Biznesmenët thonë se për të pasur forcë cilësore duhet të investojnë akoma. Ministria e ekonomisë bashkë me kompanitë e vendit dhe Universitetin e Evropës Juglindore, realizoi trajnim intensiv për të rinjtë.
"Lënia e një përshtypje të mirë në takimet e para me afaristët, njoftimi me terminologjinë bazike rreth fushës së biznesit dhe ekonomisë dhe në fund ishte gjenerimi i ideve që do të krijonte vende pune për të trajnuarit, por edhe për rrethinën ku ata jetojnë dhe veprojnë", deklaroi Veland Ramdano, profesor universitar në UEJL.
Me certifikata u pajisën sot 39 të rinj të cilët i kaluan trajnimet. Disa nga pronarët e kompanive u mundësojnë të rinjve që atë të cilën e kanë mësuar ta praktikojnë në kompanitë e tyre
"Edhe ne si kompani jemi një nga subjektet që do të absorbojmë kuadro prej këtyre të papunëve, që kanë interes të punësohen. Në projektet tona, kompania ka konkurs të hapur permanent për pranimin e kuadrove, normal për ata që kanë ambicie dhe afinitet për të punuar", tha Xhemail Dauti, afarist.
Ministri i ekonomisë Valon Saraçini shprehet i kënaqur me trajnimin e të rinjve dhe paralajmëroi se me projekte të ndryshme në të ardhmen do tu ofrojë ndihmë të rinjve që të fitojnë njohuri dhe shkathtësi të reja, për tu bërë sa më konkurrues në tregun e punës.
"Nga ajo që dëgjova nga disa afarist tonë të cilët kanë pranuar dhe kanë diskutuar me studentët gjatë këtyre trajnimeve, ka vend pothuajse për të gjithë këta të rinj që kanë marrë pjesë në këtë proces të trajnimeve. Mirëpo çështja kyçe, çështja kryesore është që këta të rinj të kenë ide të mira të cilat përmes një biznes plani të mirë do ti prezantojnë deri tek kompanitë", deklaroi Valon Saraqini, Ministër i ekonomisë.
Përveç investitorëve të vendit edhe investitorët e huaj u ankuan se kanë problem të gjejnë forcë punëtore të kualifikuar dhe cilësore në vend. Për këtë shkak ministria bën trajnime për rikualifikim ose përsosje të rinjve që të mund të jenë sa më konkurrues për punëdhënësit. Verica Pavllovska
