VLORE - Tre të vrarë kanë mbetur pas një atentati me kallashnikov rreth orës 16:00 në plazh, në zonën e kalasë pranë Ujit të Ftohtë në Vlorë në praninë e mbi 300 pushuesve. Sipas të dhënave për "A1Report!", shenjestra e sulmit mbi pushuesit e një resorti privat ka qënë Sokol Isufaj nga Kurjani i Fierit, me të cilin autori i krimit ka debatuar në një lokal pak para vrasjes, kurse dy personat e tjerë, ndërmjet tyre një grua, duket se janë viktima të rastësishme. Gruaja quhet Diana Ademi, 53-vjeçe nga Vlora dhe tjetri Serdi Bajlozi, 17-vjeç nga Prrenjasi.
Asnjeri prej tre viktimave nuk ka qënë në shoqërinë e njeri - tjetrit, por janë gjendur rastësisht pranë. Viktimat janë dërguar në morgun e qytetit, pasi nuk kanë arritur t'u mbijetojnë plagëve.
Viktimat janë goditur me kallashnikov nga një person, që ka qëlluar nga maja e shkallëve të gurta të plazhit e më pas është larguar me shpejtësi me një Fuoristradë tip Land-Rover me targa të huaja ngjyrë kafe.
Autori përshkruhet nga dëshmitarët si një i ri 25-vejçar me flokë të shkurtra dhe pantallona të shkurtra. Rruga për në Ujin e Ftohtë u bllokua nga policia, e cila po heton ngjarjen dhe shoqëroi dëshmitarët në komisariat.
KUSH ESHTE SOKOL ISUFAJ E VIKTIMAT E TJERA
Burimet për "A1Report" bëjnë të ditur se viktima Sokol Isufaj, 34-vjeç, është nipi i Ardian Isufajt, i njohur me emrin "Qorri" si një "të fortët" e Roskovecit", vrarë në vitin 1997. Ai ka qënë një nga personat e shoqëruar në polici për vrasjen e deputetit Fatmir Xhindi në Roskovec.
Serdi Bajlozi, 17 vjeçari nga Prrenjasi, ishte duke kaluar pushimet në Vlorë tek halla e tij sëbashku me motrën më të madhe, kur është prekur nga plumbat.
ORA 20:45 DESHMITE NE POLICI
Dëshmitarët në polici kanë treguar se viktima Sokol Isufaj ka debatuar disa minuta para vrasjes me autorin e ngjarjes në një lokal dhe më pas është kthyer në plazh. Por autori e ka ndjekur nga pas dhe që sipër shkallëve, ka nxjerrë armën duke shtënë mbi të dhe pushuesit e tjerë që u bënë viktima.
ORA 19:22 POLICIA VENDOS SHPERBLIM PER INFORMATORIN, VRASJA PAS NJE GRINDJEJE OSE PER HAKMARRJE
Policia ka identifikuar tre viktimat, por jo autorin e krimit, për të cilin ka kërkuar informacion kundrejt shpërblimit.
Ora 16:50 TE SHTENA ME ARME NE PLAZH, TRE VIKTIMA DHE NJE I PLAGOSUR
Sipas korrespodentit Armand Xhelili nga Vlora, "në zonën e Ujit të Ftohtë ka pasur të shtëna me armë. Bëhet fjalë për person që ka dalë nga një makinë në zonën e plazhit dhe prej saj ka qëlluar me armë zjarri mbi pushuesit, duke vrarë tre vetë, ndërmjet tyre një grua."
