Nuk pushojnë sulmet që pushteti ua shkakton mediave private elektronike në favor të TVM-së. Me dy ligje të reja, që janë në procedurë parlamentare, vendosen një varg kufizimesh për mediat private elektronike, në kohën kur për servisin publik vlejnë pothuajse rregulla tjera, më të volitshme, të lojës. Praktikisht, TVM-së i lihen duart e zgjidhura edhe në pjesën e financimit edhe në pjesën e programit, kurse mediave private elektronike u imponohet detyrime, sipas të cilave, nëse duan të bëjnë ndryshime të 10% të skemës programore, doemos duhet të marrin aprovim nga Agjencia, që do të formohet. Kjo do të thotë se, nëse për shembull ndonjë televizion, jashtë skemës fillestare programore, i blen të drejtat për të transmetuar kampionat të futbollit, këtë nuk do të mund ta emetojë pa aprovimin e Agjencisë, hap ky të cilin të gjitha mediat private elektronike e vlerësojnë si kontestues. Kjo është vetëm një nga dispozitat, e cila nëse shkelet, media do të marrë gjobë prej 1% të të ardhurave të përgjithshme vjetore, por mund të përballet edhe me ndalesë të punës në afat të caktuar kohor. Kjo paraqet goditje serioze për biznesin mediatik dhe për këtë arsye mediat private elektronike kërkojnë, gjobat të jenë fikse. Por, obligimet që i imponon shteti nuk ndalin këtu. Vendoset edhe detyrimi që televizionet private të emetojnë tetë orë në javë muzikë maqedonase edhe atë gjysma të jetë gjatë periudhës prej orës 7 deri në 19, obligim ky për të cilin mediat private elektronike konsiderojnë se nuk ka arsyetim të plotë meqë për arritjen e disa qëllimeve më të mëdha, shteti e ka në dispozicion servisin publik, i cili në mënyrë plotësuese krahas parave nga reklamat, merr edhe nga Buxheti. Përkundër një varg paralajmërimesh deri te pushteti drejtuar nga mediat private elektronike, ai thuajse mbetet i shurdhër ndaj vërejtjeve kryesore që i drejtohen, e që seriozisht do ta prishin tregun mediatik. Përveç mediave private elektronike, në pjesën që ka të bëjë me profesionin gazetaresk tashmë një kohë të gjatë një pjesë e gazetarëve bëjnë të ditur se me ligjin i cili miratohet kufizohet liria shprehjes së lirë dhe kërkojnë që i njëjti të stopohet. Megjithatë që të dyja ligjet janë në rend dite të komisioneve parlamentare të caktuara për 20 gusht, ditën e parë të punës së deputetëve. Natasha Stojanovska