26 nxënës të klasës së parë të shkollës fillore periferike 'Dituria' në fshatin Krushopek prej 3 ditësh kanë nisur bojkotin e mësimit për shkak të vendimit të komunës së Sarajit për të punësuar një mësuese nga fshati fqinjë Shishovë dhe jo mësuesen nga fshati i tyre e cila vazhdon ti mësoj fëmijët jashtë objektit shkollor.
"Kjo është e Krushopekit, ajo tjetra është e fshatit Shishovë, para 1 viti ka dashur të punësohet në Shishovë, por ata nuk e kanë lejuar, nuk e dimë arsyen, por nëse nuk është e dëshirueshme për fshatarët e Shishovës atëherë si ta duam ne në Krushopek", tha Shaban Xhelili, kryetar i këshillit të prindërve.
"Ne mendojë se kemi edhe mësuese dhe mësues të fshatit Krushopek, nuk lejojmë assesi të vije prej fshatrave të tjerë. Ajo ka konkurruar edhe në fshatin e vet, edhe vitin e kaluar, atë nuk e kanë dashur as në fshatin e vetë e lëre më tek ne", u shpreh Rasim Ebipi, prind.
"Komuna mund të vendos për këtë, unë nuk jam kundër komunës, mirëpo me pëlqim të fshatarëve, pasi ky fshat ka kuadrot e veta, ka rini me fakultete, jo 1 por 70-80 që janë të papunë" Mustafë Ebipi, prind.
Ndërkohë drejtori i kësaj shkolle thotë se mësuesja që është dërguar nga Komuna e Sarajit në Krushopek i plotëson të gjitha kushtet për të dhënë mësim në atë shkollë dhe gjithçka sipas tij ka qenë në pajtim me ligjin.
"Arsimtarja i plotëson të gjitha kushtet, prindërit që janë të revoltuar nuk kanë të drejtë në atë revoltë pasi ne nuk mund të humbin mësimin deri sa ata të vendosin edhe pse nuk janë organ që vendos për punësimet në atë shkollë periferike. Procedura e mëtutjeshme do të jetë kjo,konform ligjit ne duhet të bëjmë shpalljen e vendeve të lira, kur do të merret ky hap, do të kenë të drejtë të konkurrojnë të gjithë ata që mendojnë që i plotësojnë kushtet konform ligjit, dhe kështu do të përzgjidhet edhe arsimtari i cili do të vazhdojë me punë në atë shkollë", tha Rafiz Hamiti, drejtor i SH.F 'Dituria' Saraj.
Nga komuna gjithashtu thonë se kanë emëruar mësues të ri në këtë shkollë meqë përkundër ofertën së bërë banorëve për të zgjedhur një kuadër nga fshati i tyre ata nuk e kanë bërë një gjë të tillë për shkak të dallimeve që kanë pasur në përzgjedhjen e kandidatit. Valmir Kuçi
