Gazsjellësi "Rrjedha e Jugut" hapi luftën jo vetëm ndërmjet Rusisë dhe Bashkimit Evropian, por edhe në mesin e disa shteteve anëtare të BE-së të cilat janë pjesë e projektit dhe shteteve tjera anëtare të cilat nuk janë pjesë e këtij projekti. BE-ja nesër do të vendosë fatin e gazsjellësit, kur do të mbahet takimi ndërmjet komisionarit Evropian të Energjetikës, Gynter Etinger dhe përfaqësuesve të vendeve pjesëmarrëse në projektin "Rrjedha e Jugut". Në Maqedoni, megjithatë, u hap debati nëse vendi i shkel dispozitat e Marrëveshjes së Stabilizim-Asociimit me përfshirjen në projektin "Rrjedha e Jugut".
"Firmosja arbitrare, e pakoordinuar e çfarëdo marrëveshjeje, pavarësisht se a bëhet fjalë për projektin "Rrjedha e Jugut" apo diçka tjetër, paraqet një devijim nga Marrëveshja e Stabilizim-Asociimit, kështu që duhet që Qeveria të thotë se a ka ndonjë koordinim sa i përket nënshkrimit të projektit "Rrjedha e Jugut" me Komisionin Evropian, sepse nëse ne duam të jemi pjesë e BE-së dhe jemi shtet kandidat, atëherë ne duhet të kemi parasysh se cilët janë planet e BE-së për rajonin dhe për gjithë Evropën", tha Bojan Mariçiq, drejtor Ekzekutiv i QRAE (Qendra Rinore për Arsim Evropian).
Megjithatë, pasojat për Maqedoninë nëse nuk i respekton paralajmërimet e Komunitetit Evropian të Energjetikës, më tepër do të jenë politike se sa juridike, konsideron Mariçiq. Por në çdo rast, është e dëmshme që Maqedonia vetë të përjashtohet nga rrjedhat evropiane të energjetikës.
"Unë mendoj se pasojat do të ishin më shumë politike se sa juridike, sepse kjo Marrëveshje është juridikisht e vlefshme dhe nuk mund të thirremi në përgjegjësi si shtet, por mendoj se i tërë implementimi i tij është në ngecje. Ne nuk jemi në fazën e dytë të implementimit të Marrëveshjes së Stabilizim-Asociimit, ende jemi në fazën e parë dhe i tërë zbatimi i tij ka një dimension politik, sepse Këshilli për mbikëqyrjen e tij përbëhet nga qeveritë e të gjitha vendeve dhe nga Komisioni Evropian", u shpreh Bojan Mariçiq, drejtor Ekzekutiv i QRAE (Qendra Rinore për Arsim Evropian).
Ditë më parë ministri i Financave Zoran Stavreski tha se këtë problem duhet që ta zgjidh Brukseli me kompaninë ruse "Gazprom", e cila është bartëse e projektit ndërkombëtar "Rrjedha e Jugut". Kryeministri rus Dimitri Medvedev, kohë më parë deklaroi se marrëveshjet dypalëshe janë para legjislacionit evropian, që do të thotë, se marrëveshjet e nënshkruara mes shteteve për ndërtimin e gazsjellësit "Rrjedha e Jugut" kanë përparësi në raport me legjislacionin e Bashkimit Evropian. Ndërkaq, Komisioni Evropian i paralajmëroi të gjitha vendet që kanë nënshkruar marrëveshje për gazsjellësin "Rrjedha e Jugut", ti harmonizojnë me ligjet e BE-së. Krahas shteteve anëtare, si Bullgaria, Sllovenia, Hungaria dhe Austria, gjithashtu u porositën edhe Serbisë dhe Maqedonisë si anëtarë të Bashkësisë Evropiane të Energjetikës. Nga zëvendës-kryeministri Stavreski, edhe pse kërkuam përgjigje për situatën e re, ai nuk u përgjigj nëse Qeveria do ...
