Arkivoli i Nelson Mandelës është çuar në vendlindjen e tij për t'u varrosur nesër. Do të jetë familja, por edhe njerëzit e vendlindjes së tij, që do e ruajnë të prehet trupin e tij në Kepin Lindor të Afrikës së Jugut. I mbuluar me flamurin kombëtar të këtij vendi, arkivoli me trupin e pajetë të ish presidentit legjendar është transportuar nga shërbesa e lamtumirës në Pretoria, në një aeroplan ushtarak, i cili gjatë fluturimit është shoqëruar edhe nga dy aeroplanë luftarakë. Arkivoli u aterrua në Mthatha e pastaj u dërgua në fshatin e lindjes dhe fëmijërisë së Mandelës, Kunu. Pikërisht këtu do të mbahet edhe ceremonia shtetërore e varrimit të ikonës së luftës kundër aparteidit. Mediat e huaja spekulonin sot se në ceremoninë e nesërme të varrimit do të mungojë Desmond Tutu, ish arqipeshkvi dhe miku më i ngushtë i Mandelës. Ka të dhëna se ai nuk është ftuar në ceremoni, për arsye politike. Ndërkaq, ngjarja më e rëndë për Afrikën e Jugut, vazhdon të nënvizohet nga këngët dhe kërcimet e qytetarëve, si një formë homazhi për ish liderin e tyre. Në vend të zisë, qytetarët kërcejnë e këndojnë, duke celebruar jetën dhe arritjet e Mandelës në luftën kundër aparteidit. Funerali shtetëror i Mandelës është i pari që realizohet në Afrikën e Jugut, dhe si i tillë, do të përfshijë nderime nga forcat ushtarake, një përshëndetje me 21 të shtënash në ajër, dhe një fluturim aeroplanësh ushtarakë nga forcat ajrore të vendit. Në ceremoni është parashikuar gjithashtu një hapësirë e shkurtër për një ritual të moçëm tradicional nga fisi Xhoza prej nga vjen Mandela. Sipas besëtytnive të këtij fisi, me vdekjen, Mandela nuk i ka lënë banorët e Afrikës. Është thjesht trupi i tij që do të prehet në dhe, pasi shpirti dhe fryma e tij do të jenë kudo! Admir Qose
