GJIROKASTËR - Në shkollat 'Koto Hoxhi' dhe 'Urani Rumbo' mësojnë italishten si gjuhë të dytë rreth 180 nxënës, ndërkohë që numri ka tendencë rritjeje nga viti në vit, si pasojë e zgjerimit të njohurive për këtë gjuhë dhe masivizimin e kulturës italiane në ambjente të ndryshme brenda dhe jashtë shkollore.
Gjuha italiane fillon për nxënësit e klasave të gjashtë e deri në klasat e nënta, ndërkohë që kërkesa e vetë nxënësve dhe prindërve të tyre është që italishtja të shtrihet edhe në shkollat e mesme të qytetit.
Vetë nxënësit që janë pjesë e Seksioneve Europiane, shprehen mjaft të motivuar për perfeksionimin e gjuhës italiane edhe me metoda të tjera duke përfshirë edhe zgjerimin e kulturës së tyre përmes librave në italisht.
"Zhvillojmë 5 orë në javë, por edhe pse jemi më të ngarkuar se klasa të tjera, nuk e ndjejmë lodhjen. Përkundrazi, ndjejmë kënaqësi që mësojmë këtë gjuhë kaq të veçantë dhe të bukur, edhe në orën e mësimit jemi shumë të lirshëm dhe e shprehim mendimin tonë pa problem".
"Mua më pëlqen shumë italishtja dhe është një lëndë shumë e bukur. Dua që ta vazhdoj edhe në gjimnaz. Më pëlqen shumë. Ka shumë gjëra të reja dhe mësuesja na shpjegon çdo gjë që kemi të paqartë", shprehen nxënësit e shkollave 8-vjeçare.
Ndërkaq, Konsulli i Nderit i Republikës së Italisë në Gjirokastër Teodor Bilushi, shprehet optimist se italishtja duhet të zërë vend edhe në programet e gjuhëve të huaja në Licetë e Gjirokastrës.
"Ky projekt ka dhënë mesazhe pozitive. Kjo duket tek frekuentimi i këtyre klasave prej nxënësve më të mirë ku përveç mësimit të gjuhës italiane ata janë dhe protagonistë së shumë aktiviteteve kulturore dhe falë mbështetjes që i është dhënë këtyre klasave nga programet e Institutit italian të kulturës janë organizuar aktivitete të përbashkëta me autorë italianë, regjisorë", tha Teodor Bilushi, Konsulli i Nderit të Italisë në Gjirokastër.
Seksionet europiane kanë mbështetjen e institucioneve shtetërore shqiptare dhe italiane, si dhe Ambasadën e Italisë në kryeqytet, Konsullatën e Përgjithshme italiane në Vlorë dhe atë të nderit në Gjirokastër, Institutit Italian të Kulturës etj.
