SHKUP- Persona të panjohur kanë hyrë në fshatin Llokë të Maqedonisë ku banojnë shqiptarë dhe kanë dëmtuar kamionë dhe vetura në pronësi të shqiptarëve. Mediat shqiptare në Maqedoni thonë se ngjarja ka ndodhur rreth orës 22:00, të mbrëmjes së 31 janarit 2014. Banorët thonë se sulmi është kryer nga huliganë maqedonas të cilët jo vetëm kanë dëmtuar mjetet por dhe kanë lëshuar thirrje kundër shqiptarëve. Banorët kanë kërkuar masa urgjente për gjetjen e autorëve të sulmit, dhe kanë paralajmëruar se ata vetë do të organizohen për të mbrojtur pronat e tyre. Edhe kryetari i Komunës së Sarajit Bekim Murati i ka bërë thirrje organeve të rendit që të zbardhin sa më shpejt ngjarjen duke parandaluar përshkallëzimin e mëtejshëm të gjendjes. Në fshatin Llokë jetojnë rreth 100 familje, ndërsa incidente të tilla kanë ndodhur dhe më parë. Në një video të publikuar nga Alsat i Maqedonisë banorët e fshatit thonë se janë të frikësuar dhe i bëjnë thirrje Ali Ahmetit, që është pjesë e koalicionit të qeverisjes të reagojë.
