Dhjetëra persona për të cilët thuhet se i përkasin nacionalitetit maqedonas kanë sulmuar shtëpitë e shqiptarëve në fshatin Llokë në dalje të Shkupit, të premten mbrëma. Banorët deklaruan se sulmi ka ndodhur rreth orës 22h, kur disa të rinj të ardhur nga lagja e banuar me maqedonas, pa ndonjë pretekst kanë filluar të gjuajnë shtëpitë e të tyre me gurë dhe gjësende të tjera, me ç'rast kanë thyer xhamat e disa makinave. Fatmirësisht nuk ka të lënduar.
"Kur mbërrita këtu ishin mbledhur mbi 70 maqedonas. Bërtisnin "shiptari", gjuanin me gurë. U ktheva në shtëpi, ishin edhe gratë te porta. Na sulmuan, gjuanin me gurë", deklaroi një banor.
"As polici nuk ka këtu, të vjen të shohë se çfarë është puna. Ata nesër do të nisen edhe në shtëpi të na vinë. Këtu kanë gjuajtur me gurë, kanë dëmtuar veturat, te porta kanë gjuajtur me gurë. Nëse policia nuk merr masa këtu, atëherë ne do të marrim masa, dhe ai që vjen, nuk del i gjallë andej", u shpreh një banor.
"I bëj apel Gruevskit ose le ta udhëheq këtë Qeveri si duhet, sepse ne nuk kemi kohë ti bartim fëmijët me vetura çdo ditë, ose le të na paguan shpenzimet sepse ne nuk guxojmë të lëshojmë nipat tanë të shkojnë në shkollë. Jemi bërë ne pleqtë sikur nxënës, çdo mëngjes shkojmë në shkollë", tha një banor tjetër.
Në vendngjarje ishte edhe kryetari i Komunës së Sarajit Bekim Murati, i cili apeloi organet e rendit që sa më shpejtë të gjejnë autorët.
"I bëj apel institucioneve, sidomos policisë që sa më shpejtë të gjejë autorët e kësaj vepre të shëmtuar, e cila nuk ndikon në raportet e mira ndëretnike në mes maqedonasve dhe shqiptarëve. Do të shfrytëzojmë të gjitha mjetet demokratike që të mbrojmë të gjithë banorët e Llokës dhe banorët e Komunës së Sarajit", u shpreh Bekim Murati, kryetar i Komunës së Sarajit.
Nga Ministria e Punëve të Brendshme konfirmojnë rastin, ndërsa njoftojnë se organet e rendit kanë arritur të identifikojnë disa nga sulmuesit. Sipas policisë, janë ndaluar 14 të rinj që besohet të kenë qenë përfshirë në incidentin e mbrëmshëm. Benjamin Arifi
