Partia e kryeministrit Gruevski VMRO DPMNE-ja po përgatitet në mënyrë intensive për konventën zgjedhore për kandidat presidencial. Përderisa BDI-ja insiston në kandidati konsensual, në VMRO DPMNE madje as që e përmendin fjalën konsensual. Në konkursin për zgjedhjen e kandidatit të VMRO-së për president të shtetit, deri tani ka mbërritur vetëm kandidatura e Jove Kekenovskit si dhe iniciativa për rikandidimin e presidentit aktual Gjorge Ivanov.
"Ka mbërritur iniciativë për kandidimin e z. Gjorge Ivanov, e nënshkruar nga mbi 50 intelektualë, doktorë, akademikë, klerikë nga më tepër bashkësi fetare dhe sportistë. Por, ende nuk kemi prononcim personal nga ana e Ivanovit lidhur me këtë iniciativë", u shpreh Emil Dimitriev, Sekretar i Përgjithshëm i VMRO-së.
Mësohet se këtë iniciativë e kanë firmosur edhe funksionarë të lartë të VMRO DPMNE-së, si zv/kryeministri Zoran Stavrevski, kryetari i Qytetit të Shkupit Koce Trajanovski, deputeti Antonio Milloshovski dhe kryetarë të tjerë komunash. Mediat në gjuhën maqedonase ditë më parë, duke cituar burime nga VMRO DPMNE-ja kishin përmendur si nënshkrues të iniciativës edhe rektorin Velimir Stojkovskin, sportisten Indira Kastratoviq dhe bashkëshorten e ish presidentit të ndjerën Boris Trajkovski, Villma Trajkovskën. Por tre të fundit mohuan të kenë vendosur firmën në ndonjë iniciativë të tillë. Madje Villma Trajkovska edhe sot u distancua nga ky peticion.
"Unë tashmë kam dhënë deklaratë lidhur me këtë çështje", u përgjigj Villma Trajkovska. Kandidati presidencial i VMRO-së do të zgjidhet në konventën zgjedhore më 1 mars në sallën universale në Shkup, me votat e 1300 delegatëve të saj. Benjamin Arifi
