RUSI- Ish-presidenti i Ukrainës Viktor Janukoviç ka folur rreth orës 14:00 në një konferencë për shtyp në qytetin e Rostov të Rusisë. Janukoviç ka ritheksuar se vazhdon të jetë president legjitim i vendit dhe se nuk e njeh votimin e shkarkimit nga parlamenti ukrainas, duke i akuzuar se kanë kërcënuar deputetët dhe familjet e tyre me armë në kokë, për ta shkarkuar.
Ai u shpreh se u detyrua të largohej nga Ukraina pas kërcënimeve me jetë, madje shtoi se makina e tij u qëllua me armë zjarri ndërsa largohej nga Kievi.
Ndërkaq, është shprehur se nuk do të kandidojë në zgjedhjet e parakohshme presidenciale të 25 majit.
I pyetur nëse ishte takuar me presidentin rus Vladimir Putin, Janukoviç tha se vetëm kishte biseduar për disa minuta në telefon, por nuk e përjashtoi mundësinë për t'u takuar me të. Ai shtoi se ishte i habitur se përse presidenti rus nuk kishte reaguar lidhur me situatën në vend. Ai i bëri thirrje Rusisë të veprojë në Ukrainë.
Ish-presidenti i Ukrainës foli dhe për situatën në Krime duke thënë se reagimi i banorëve ishte diçka e natyrshme pasi po mbronin veten dhe familjet e tyre. Ai i kërkoi popullit të Krimesë të mos u nënshtrohej banditëve që kishin marrë pushtetin në Ukrainë. Gjithsesi Janukoviç theksoi se situata në vend nuk duhej të përshkallëzohej deri në gjakderdhje siç ndodhi në Kiev dhe se Krimea duhet të vazhdojë të jetë pjesë e Ukrainës, duke mbajtur të drejtat e autonomisë.
Lidhur me ngjarjet e javëve të fundit në Kiev ku mbetën të vdekur rreh 100 protestues, Janukoviç u shpreh se nuk dha urdhër që policët të qëllonin protestuesit. Sipas tij, forcat e policisë ishin të paarmatosur deri në momentin kur disa prej tyre u qëlluan për vdekje me armë zjarri. Ish-presidenti tha gjithashtu se do të rikthehet menjëherë në Ukrainë, sapo të ketë garanci për sigurinë e tij dhe të familjes së tij.
Ndërkohë pak minuta para konferencës për shtyp të Viktor Janukoviç, rregullatori financiar i Zvicrës, FIMNA bëri të ditur se të gjitha asetet e ish-presidentit, djalit të rij Oleksander, ish-kryeministrit Azarov dhe 17 zyrtarëve të tjerë ukrainas ishin bllokuar.
Të gjitha bankat zvicerane do të kooperojnë me forcat e rendit për të bllokuar të gjitha llogaritë bankare që lidhen me emrin e tij. Megjithatë, deri më tani nuk ka asnjë provë se Janukoviç ka depozituar para në bankat zvicerane.
Pritet që dhe Parlamenti Europian i Strasburgut të bllokojë asetet jashtë vendit të ish-presidentit. Ndërkohë që ditën e sotme do të hapet dhe një investigim mbi përvetësimin masiv të aseteve ukrainase.
Kryeministri i Ukrainës akuzoi Janukoviç dhe qeverinë e tij se ka transferuar 70 miliardë dollarë në llogaritë e tij bankare jashtë vendit.
