Është zhvilluar ditën e diel, në ambientet e Akademisë së Hipizmit, gara e parë për vitin 2014 e Kampionatit Kombëtar të Hipizmit, ku morën pjesë 6 kalorës në disiplinën Jumping për kategorinë Senior; për të rriturit.
Gara e djeshme u zhvillua me 2 raunde; raundi i parë me pengesa me lartësi 110 cm, ndërsa raundi final me lartësi 130-135 cm.
Ishte një garë miqësore që shënoi hapjen e sezonit të garave për kampionatin e Hipizmit për vitin 2014.
Sipas presidentit të Federatës Shqiptare të Sporteve me Kuaj, Z. Klodian Allajbeu kjo ishte gara e parë për këtë vit, ku kampionati do të vazhdojë dhe do të ketë një garë për çdo dy javë, deri në shtator të këtij viti, ku ekipi jonë do të marrë pjesë edhe në garat ballkanike në Kampionatin Ballkanik për disiplinën Jumping që do të organizohen në Zagreb të Kroacisë. Në këtë garë, në të cilin garuan kalorës vendas nuk u shpërndanë trofe, por në vazhdim do të zhvillohen gara me një numër më të madh kalorësish, si dhe gara për disiplinën Jumping, kategoria Junior, që do të garojnë për çmime dhe trofe të ndryshme.
