Veprimtari i njohur i çështjes shqiptare Adem Demaçi, në emisionin Debat në RTK, ka vlerësuar se çështja kombëtare në Maqedoni duhet të vihet përpara luftës për pushtet. Kështu sipas tij, dalja me kandidat presidencial nga PDSH-ja e Menduh Thaçit është për interesa të ngushta partiake dhe paraqet gabim politik që do ti dobësojë pozicionet etnike të shqiptarëve të Maqedonisë.
"Politikisht gabon shumë kur del me kandidat të vetin dhe dëshiron ta ligështojë, sepse faktikisht ai e ligështon krahun e shqiptarëve, duke nxjerrë kandidat të vetin këtu, sepse disa vota ndoshta do ti merr edhe ai kandidat i tyre, në vend se ato vota të koncentrohen në këtë anën tjetër. Prandaj është koha që edhe Thaçi të heq dorë nga ai farë kandidati i vet, dhe ti bashkojë shqiptarët dhe të gjitha votat e tyre, dhe të mos mundet Gruevski të arrijë atë që dëshiron ai", deklaroi Adem Demaçi, veprimtar.
Sipas Demaçit, është çështje kohe kur Evropa do të fillojë ti bëjë shtypje Gruevskit që të mos udhëheqë politikë përjashtuese ndaj shqiptarëve. Ai porositi Gruevskin se nuk duhet harruar se shqiptarët e Maqedonisë nuk janë jetim, posaçërisht pas asaj që ndodhi në Ukrainë.
"Pas ngjarjeve që ndodhën me Rusinë, nuk do të tolerojë Evropa një politikë të njëanshme e cila përbuzë shqiptarët të cilët nuk janë pakicë. Ata janë gjysmë milioni, dhe ata kanë peshë të madhe edhe ekonomike, njerëzore dhe kulturore. Ata i kanë dy fqinj, Shqipërinë dhe Kosovën, dhe ne nuk mund të rrimë duarkryq e të bëjmë sehir se çfarë bën Gruevski me politikën e vet, dhe se si ai përbuz pjesëmarrjen në politikë, në mbarëvajtjen e shtetit maqedonas i cili siç e dimë ne ka probleme edhe me grekët, pikërisht sepse këta janë kryeneç", tha Adem Demaçi, veprimtar.
Demaçi, gjatë intervistës në RTK ka folur edhe për zhvillimet e fundit në Serbi, Kosovë dhe trojet tjera ku jetojnë shqiptarët. Benjamin Arifi
