Ndërmjetësi i OKB-së për emrin Metju Nimic ka propozim të ri për emrin, përkatësisht zgjidhje të pranueshme për Greqinë dhe Maqedoninë. Kështu shkruan sot gazeta greke "Proto Tema" sipas të cilës, Nimic shpeshherë nxjerrë si sprovë këto propozime, dhe ngecjen e bisedimeve e shfrytëzon si recetë për të thirrur zgjedhje në Greqi apo Maqedoni.
"E vërteta është se në të kaluarën, në periudhën e qeverisë së Simitisit dhe Papandreut, të dyja Qeveritë kishin rënë dakord për kompromis rreth çështjes së emrit dhe kishin arritur një marrëveshje, por kjo nuk ka shkuar më tej për shkak të zgjedhjeve që çuan në ndërrimin e pushtetit në Greqi", thuhet në shkrimin e sotëm të gazetës 'Proto Tema'.
Ndërkohë mediat në Greqi nuk kanë bërë komente, përveç transmetimit të takimit të Nimicit me Jolevskin dhe Vasilakisin në Nju Jork. Nga ajo që u mësua publikisht, Numic pranoi vetë se në bisedime nuk pati asgjë të re, përveç faktit që palët ranë dakord të intensifikojnë takimet për gjetjen e mundshme të një zgjidhje.
"Nuk kemi rezultate konkrete nga takimi. Shqyrtuam disa nga idetë e mëhershme që kanë qenë në tryezë dhe të dyja palët, dhanë këndvështrimet rreth tyre. Biseduam rreth asaj se si procesi të ecë përpara dhe të dyja palët ranë dakord që përshpejtohen këto bisedime, edhe pse nuk kemi arritur zgjidhje, megjithatë palët ndihet komode me këtë format të zhvillimit të bisedimeve..Unë sugjerova që t'i shqyrtojmë vazhdimisht idetë e vjetra sepse mund të gjejmë gjallëri tek ato, apo mund të bëhen disa ndryshime. Përderisa të gjendet zgjidhja të gjitha opsionet janë të hapura", tha Methju Nimic, ndërmjetës i OKB-së për çështjen e emrit.
Takimin e radhës Nimic e paralajmëroi për në maj, ndërkaq edhe mundësinë që pas zgjedhjeve në Maqedoni dhe Greqi, të vizitojë rajonin. Nimic tha se arsyeja e inicimit të bisedimeve ishte që t'i jepte fund pasivitetetit të palëve, të cilat nuk inicionin takim prej 5 muajsh. Propozimi i fundit i ndërmjetësit Nimic, ai i prillit, ishte Maqedonia e Epërme, megjithatë palët nuk arrijnë të kapërcejnë dallimet e theksuara siç deklaroi atëherë Nimic, rreth përdorimit të emrit ri. Valmir Kuçi
