DURRËS -- 7 Prilli, i njohur si Dita e Rezistencës ndaj pushtuesve italianë, është përkujtuar sot, në të 75-in vit në vendin ku Mujo Ulqinaku i priti me armë pushtuesit e huaj.
Në kujtim të kësaj ditë, aty ndodheshin Kryebashkiaku i Durrësit Vangjush Dako, Kryetari i Komitetit Kombëtar të Veteranëve të LANÇ-it, Rustem Peçi, qindra qytetarëe veteranë, pasardhës familjesh dëshmori etj.
Kryebashkiaku Vangjush Dako tha: "Si sot, 75 vjet më parë, Italia fashiste pushtoi Shqipërinë. Patriotët shqiptarë luftuan si mundën, ku mundën dhe sa mundën për liri dhe dinjitet. Ishin të varfër, por Shqipëria ishte një vend i pasur me gra e burra idealistë dhe ata ishin krismat e para antifashiste në Evropë. Nder dhe mirënjohje për të gjithë ata!"
Në ceremoni, për sakrificat e luftëtarëve shqiptarë foli edhe kryetarit i Veteranëve, z.Rustem Peçi.
