Festimi i një ditëlindje në Lushnjë ka degjeneruar në rrahje masive mes të ftuarve dhe uniformave blu. Efektivët e policisë janë paraqitur rreth orës 2 të mëngjesit, në lokalin ku festohej dhe kanë kërkuar të ulej muzika pas ankesave të marra nga banorët përreth, kërkesë e cila u pranua nga pronarët e lokalit dhe të ftuarve, por që në fakt ishte vetëm një mënyrë për të larguar patrullën së policisë.
Ndodhur në këto kushte, efektivat e policisë lokale të Lushnjes, janë rikthyer sërish pas 15 minutash, duke dhënë ultimatum për mbyllje lokali për prishje të qetësisë publike. Kaq ka mjaftuar që mes të ftuarve dhe punonjësve të patrullës policore të fillonte rrahja masive.
Në pamundësi për të menaxhuar këtë situatë në mbështetje të kolegëve të tyre, janë nisur edhe Forcat e Ndërhyrjes së Shpejtë nga Fieri, të cilët kanë vendosur situatën nën kontroll dhe kanë arrestuar vëllezërit Adem, Sokol dhe Bardhyl Xhepexhiu, ndërsa është shpallur në kërkim Marius Xhepexhiu.
Dëmet kanë qenë të shumta si në ambjentet e brendshme të lokalit ashtu dhe në automjetet e policisë, ndërsa tre efektivë janë plagosur dhe ndodhen në spital. E ndërsa çdo gjë ka shkuar drejt normalizimit, tre vëllezërit Xhepexhiu janë sërish bashkë, por këtë herë pas hekurave, ku në vend të qirinjve të tortës do të përballen me veprat penale: "Prishje të rendit e qetësisë publike", "Kundërshtim të punonjësit të rendit publik", "Goditje për shkak të detyrës", si dhe "Shkatërrim prone".
