Edhe liderët e partive politike e kanë vlerësuar si të qetë ditën zgjedhore. Atmosferë e qetë por me parregullsi të imta vende-vende ka karakterizuar këto zgjedhje sipas tyre. Pas zgjedhjeve parlamentare, presin vazhdimin e zhvillimit ekonomik, uljen e papunësisë dhe përparim në proceset euro-atlantike.
"Do të doja që i gjithë procesi të shkojë mirë, të kemi zgjedhje të lira, të kemi zgjedhje pa frikë, të pranueshme për të gjitha palët konkurrente. Është një mandat shumë interesant. Ky mandat është në një periudhë, do të thosha, shumë interesante, kur vendi ynë duhet të ec përpara drejt proceseve euro-atlantike", deklaroi Ali Ahmeti, kryetar i BDI-së.
"Vazhdon gjendja e njohur e vendeve të zakonshme, si Zajaz, Osllomej dhe Kërçovë, ku kishte tentim nga oponenti ynë politik që me votim grupor dhe familjar të arrijnë rezultat të mirë, por ne tani për tani me sukses i parandaluam. Pres qeveri të re, shpresë të re dhe gjëra të mira për Maqedoninë", tha Menduh Thaçi, kryetar i PDSH-së.
"Sapo e shfrytëzova të drejtën time për të votuar dhe mund të them se deri më tani, deri në orën 15, zgjedhjet zhvillohen në një atmosferë korrekte dhe demokratike. Kemi zgjedhje të qeta dhe shpresojë se do të mbetet kështu deri në fund të ditës së zgjedhjeve dhe se, para së gjithash, do të ngadhënjej Maqedonia", u shpreh Nikola Gruevski, kryeministri i Maqedonisë.
"Sot është ditë e rëndësishme për Maqedoninë. Zoti qoftë me Maqedoninë, dëshiroj shumë sukses për vendin tonë. Lumturi dhe bereqet për të gjithë qytetarët, familje të lumtura dhe shtet i lumtur. Dëshiroj që periudha e ardhshme të jetë periudhë e zhvillimit të përshpejtuar ekonomik, qytetarë të punësuar, me jetë shumë më të lumtur se sa tani", tha Zoran Zaev, kryetar i LSDM-së.
"Dëshiroj që këto zgjedhje të jenë një ogur i mirë dhe Maqedonia të kthehet në një normalitet. Dua të theksoj se dje që u realizuan zgjedhjet në diasporë kanë qenë një masakër zgjedhore, vetëm në Zvicër është mundësuar të votohet 8% nga 17 mijë të paraqitur. Procesi ka qenë i dëmtuar rëndë në Tiranë, Austri në Itali dhe të kërkoj nga strukturat që të ankimoj zgjedhjet në Europë dhe ato të shpallen të pavlefshme", deklaroi Rufi Osmani, kryetar i RDK-së.
Prej liderëve politikë, vetëm kryetari i BDI-së Ali Ahmeti ka injoruar zgjedhjet presidenciale, duke mos e marrë fletëvotimin. Të gjithë liderët e tjerë kanë votuar edhe në zgjedhjet presidenciale, krahas atyre parlamentare. Benjamin Arifi
