http://www.vizionplus.tv
https://facebook.com/VizionPlusTV
https://twitter.com/VizionPlusTV
Dëmi ekonomik në buxhetin e shtetit për vitin e kaluar, shkaktuar nga administrata publike, sipas KLSH shkoi në rreth 100 milion euro. Me këto para do të ishte përfunduar tërësisht p.sh. autostrada Durrës -- Rrogozhinë, e gjatë vetëm 35 kilometra por prej vitesh në punime e sipër duke u bërë burim aksidentesh. Një KM rrugë autostradë në terren fushor, kushton nga 2 deri në 3 milion euro. Sipas raportit të KLSH, në krye të listës së institucioneve abuzuese është kompania shtetërore e naftës Albpetrol sh.a. me 9.1 miliardë lekë. Ndërsa kompania energjetike KESH raportohet se ka shpërdoruar rreth 2,5 miliardë lekë, duke mos likuiduar detyrimet kontraktore dhe dëm në fushën e prokurimeve. Të dyja këto shoqëri aksionere mbajnë peshën e 85% të dëmit total financiar. Ndër institucionet qendrore që shkaktuan dëmin më të lartë ekonomik për vitin 2012, kryeson Ministria e Ekonomisë me mbi 605 milionë lekë, përmes abuzimeve me koncesione apo ankande publike. Ministria e Brendshme shpërdoroi 225 milionë lekë, në fushën e prokurimeve. Më tej, janë Autoriteti i Aviacionit civil apo zyra e ALUIZNI-t, që kanë shpërdoruar më tepër fonde publike. Dëm ekonomik është zbuluar edhe me buxhetin e pushtetit lokal. Pas auditimit të 36 bashki dhe 18 komuna, raportohet një dëm rreth 400 milionë lekë. Pjesa më e madhe i përket sektorit të prokurimeve, ku spikat dëmi i shkaktuar nga Bashkia Pogradec. Në sektorin e urbanistikës përmenden Bashkia Sarandë, Pogradec, Rrëshen e Shkodër. Numri i zyrtarëve të kallëzuar për shkelje në organin e akuzës është 125 persona.
