http://www.vizionplus.tv
https://facebook.com/VizionPlusTV
https://twitter.com/VizionPlusTV
Vritet në një atentat mafioz Astrit Gjepali, i njohur si kreu i një prej bandave më të rrezikshme të Durrësit në vitin 1997, që njihej me emrin "Banda e Gjepalit". 45-vjeçari është ekzekutuar me armë zjarri në rrugën nacionale Durrës - Rrogozhinë, në vendin e quajtur Bishti i Zhurit. Gjepali ka qenë duke u kthyer për në Burgun e Peqinit ku vuante dënimin me 25 vjet, pas përfundimit të lejes 5-ditore, që i ishte dhënë nga drejtoria e Burgut. Leja, e cila kishte filluar në datën 9 janar, përfundonte sot në drekë. Por rreth orës 12:15 teksa Gjepali ndodhej në një makinë me targa të huaja bashkë me dy kunetërit e tij, Halit Fici dhe Ilir Sulkja, është përballur me breshëri të gjata automatiku. Për pasojë Astrit Gjepali dhe Halit Fici, 54 vjeç kanë mbetur të vdekur në vend, ndërsa mbeti i plagosur Ilir Sulkja. Autovetura u qëllua me breshëri në krahun e shoferit, por nga të shtënat ka mbetur i plagosur edhe një kalimtar i rastit, 23-vjeçari Mariglen Balliu. Ky i fundit së bashku me të plagosurin në makinë, u dërguan në spitalin e Durrësit dhe pas ndërhyrjes mjekësore, janë jashtë rrezikut për jetën. Një nga personat që ka qenë më afër ngjarjes, tregon se ka dëgjuar fillimisht të shtëna me armë, më pas zhurmën e makinës që ka dalë nga rruga. Policia e Kavajës, e Rrogozhinës dhe e Lushnjës, të ndihmuar nga forcat speciale nga Tirana, kanë nisur një operacion të gjerë kërkimi të autoreve të atentatit. Në komisariat janë shoqëruar shumë persona, për të dhënë dëshmitë e tyre. Afro dy orë pas krimit, policia e Lushnjës ka gjetur të djegur në fshatin Konjat një autoveturë me të cilën dyshohet se kanë udhëtuar autorët e atentatit. Për kapjen e tyre është vënë në dispozicion edhe një helikopter nga ana e ministrisë së mbrojtjes. Astrit Gjepali kishte për të bërë edhe 6 vjet e 2 muaj burg për të fituar lirinë e plote, ndërsa nga drejtoria e Përgjithshme e Burgjeve bëhet e ditur se personi në fjalë kishte përfituar leje shpërblyese pasi sipas rregullores, kishte kryer ¾ e dënimit. Gjepali ishte pjesëtar i njohur i bandave kriminale në Durrës, veprimtaria e të cilave kulmoi në vitet '97-'98. Ai ishte dënuar nga gjykata me 25 vite burg dënim, të cilin e ka marrë në mungesë ndërsa u ekstradua nga Italia në 2006-ën. Astrit Gjepali u bë i njohur për krijimin dhe drejtimin e grupit kriminal që veproi në Durrës, për disa vjet me radhë. Anëtarët e bandës së tij kanë qenë Bashkim Haxhia, Naim Qerimi dhe Mirush Jareci. Ata janë akuzuar nga prokuroria se vetëm brenda 24 orëve, në datat 15 dhe 16 shtator të vitit 1997, kanë vrarë pesë persona dhe kanë plagosur disa të tjerë. Viktimat e tyre kanë qenë shtetasit Luan Plaku, Kajmak Kullolli, Bilal Neza, Gëzim Beqiri si dhe punonjësi i policisë Nazmi Kopshti. Prokuroria kërkoi dënimin me burgim të përjetshëm për Gjepalin, 25 vjet për Qerimin dhe Jarecin, si dhe 20 vjet burg për Bashkim Haxhinë. Por pas kthimesh dhe rikthimesh në të gj...
