TIRANE - Një sasi e vogël eksplozivi e vendosur në parkimin e qendrës tregtare "Kristal Center" në Tiranë u çaktivizua me shpërthim të kontrolluar nga forcat xheniere.
Lënda eksplozive ishte vendosur në një pako të mbështjellë me natriban e cila ishte lidhur me një telefon celular. Dyshimet e policisë janë që lënda eksplozive të ishte vendosur në makinën e administratorit të qendrës tregtare, Nuredin Sula. Pakoja është shkëputur nga pjesa e poshtme e shasisë së automjetit në momentin kur shoferi ka lëvizur makinën për të dalë nga parkimi.
Kur ka tentuar të dalë në pjesën dalëse të parkimit, lënda plasëse ka rënë dhe menjëherë biznesmeni ka njoftuar policinë.
Të gjitha dyqanet e qendrës tregtare u mbyllën dhe personat e pranishëm u evakuuan. Policia rrethoi zonën duke vendosur perimetrin e sigurisë.
