Një ditë pas goditjes për vdekje të një turisti rus në plazhin e Livadhit, në Himarë, policia ka arrestuar një 44-vjeçar nga Elbasani. Ai është biznesmeni Fatmir Kuçi, pronar i një kompanie të fuqishme ndërtimit, "Victoria Invest" me qendër në Elbasan, e cila ka shtrirë aktivitetin e saj në tre shtete, Shqipëri, Kosovë, Maqedoni.
Biznesmeni i fuqishëm dispononte një motorskaf me tre motorë si dhe disa mjete të tjera lundrimi, të cilat u sekuestruan nga policia pasditen e djeshme. Mjetet ishin pa dokumentacionin përkatës.
Fatmir Kuçi njihet dhe për lidhjet e tij me Partinë Demokratike dhe kryetarin e saj, Lulzim Basha, teksa figuron të jetë sponsor i disa fushatave elektorale të demokratëve. .
Fatmir Kuçi u vu në prangat e Policisë së Vlorës, pasi ditën e djeshme rreth orës 11:00 në zonën bregdetare të quajtur "Livadh" i Himarës, ai ka qenë duke drejtuar mjetin lundrues tip skaf-plastik me mbishkrimin "Black Arrow".
Dyshohet se Kuçi ka dëmtuar aksidentalisht turistin rus Denis Kaiumov, i cili ka gjetur vdekjen për shkak të plagëve të marra, në spitalin e Himarës.
Policia ka sekuestruar dhe konfiskuar 2 mjete lundruese në përdorim dhe në pronësi të Kuçi-t, mjetin lundrues skaf-plastik me mbishkrimin "Black Arrow", 11.73 m i gjatë dhe 3.20 m i gjërë, me 3 motorë - 275 KF secili si dhe mjetin lundrues motor-deti me emrin "Viktoria-3", pa dokumentacion përkatës.
Kapiteneria Durrës: Skafi i regjistruar në Maltë
Ndërkohë, kapiteneria e Durrësit bëri të ditur për Shqiptarja.com se mjeti lundrues skaf, ishte i regjistruar në Maltë dhe i pajisur me flamur maltez.
"Çertifikatat janë lëshuar nga administrata detare malteze. Ai (Kuçi) ka lundruar me mjet të huaj. Çdo turist mund të vijë në Shqipëri me mjet të huaj, mjafton të paraqesë dokumentet. Dokumentet nuk janë lëshuar nga administrata jonë, por ajo malteze", thuhet në reagimin Kapitenerisë Detare, Durrës.
Mësohet gjithashtu se mjeti nuk është zhdoganuar në Shqipëri, pasi është marrë për përdorim turistik gjatë sezonit të verës.
