Dhjetëra maturantë që prej dy ditësh po protestojnë kundër formulës së përzgjedhjes së tyre në universitete, kanë protestuar përpara parlamentit dhe janë përplasur me forcat e policisë, pasi kanë kërkuar që të afrohen tek hyrja e Kuvendit për të biseduar me deputetët.Ata kanë dashur që të ulen në rrugën që të çon në hyrje të Kuvendit, por më pas janë zhvendosur me insistimin e policisë.
Më herët ata kanë kërkuar takim me Ministren e Arsimit e Sportit Lindita Nikolla.
Në mënyrë të organizuar ata janë shprehur se, nuk janë të qartë për vijimin e raundit të dytë të pranimeve, ndonëse Ministrja e Arsimit dhe disa dekanë e rektori i Universitetit të Tiranës sqaron çdo detaj.
Sipas tyre, amullia që është krijuar ka vetëm një qëllim, kalimin e tyre tek universitetet private.
Por një gjë e tillë nuk mund të arrihet nëse maturanti që në momentin e përzgjedhjes së lëndëve nuk e ka përzgjedhur alternativën e vijimit të studimeve të larta në një universitet privat.
?Ata që kanë nota të mira nuk janë shpallur fitues. Kjo amulli ëhstë bërë që studfentët të shkojnë drejt privatit, duke bërë korrupsion.? Tha një nga maturantët.
Ndërsa një tjetër tha se ?Ne nuk ndalim protestat, kërkojmë rikthimin e sistemit të mëparshëm,nuk jemi të përgatitur me këtë lloj sistemi për pranimin në universitete?.
Në protestën e sotme, ndryshe nga ajo e djeshmja, nuk kanë qenë të pranishëm përfaqësues apo militantë të Partisë Demokratike.
