Policia e Kurbinit ka ndaluar autorin e dyshuar të aksidentit me pasojë dy të vdekur dhe dy të plagosur që ndodhi dy netë më parë në Derven të Fushë Krujës.
Ai është Eduart Pica 22 vjeç nga Lezha. Sipas policisë, ai përplasi makinën e tij tip Benz me makinën e viktimave.
Për pasojë mjeti Volkswagen, me të cilin po udhëtonin katër shokët nga Tirana drejt Lezhës, humbi kontrollin dhe u përplas me barrierat në kah të kundërt të rrugës.
Eduard Pica ishte larguar nga vendi i ngjarjes dhe fillimisht pati dyshime se makina e viktimave kishte devijuar për shkak të shpejtësisë.
Por më pas rezultoi se ajo ishte goditur nga një automjet tjetër. Nga kjo ngjarje humben jetën Roland Kaçani e Altin Prendushi si dhe u plagosën Bledar Dauti 28 vjeç dhe Eduart Lamaj 27 vjeç.
