Gjykata e Apelit për Krimet e Rënda nuk ka liruar nga qelia ish-gjyqtarin Shkëlqim Miri, i cili u arrestua dy muaj më parë pasi akuzohej për përfshirjen në korrupsion dhe shpërdorim detyre.
Miri nuk ka fituar dot lirinë as tek Apeli, edhe pse ekspertët mjekoligjorë kanë dalë në përfundimin se ish-gjyqtari vuan nga një sëmundje rëndë tumorale. Pavarësisht këtij rezultati, ekspertët deklaruan në Gjykatën e Shkallës e Parë se nuk i rrezikohet jeta.
Report Tv ka siguruar akt-ekspertimin, në të cilin thuhet se Shkëlqim Miri është me tumor.
Ekspertiza është bërë nga eksperti Elmaz Shaqiri, ndërsa vetë ish-gjyqtari Miri, por edhe avokati i tij, kanë deklaruar se shuma prej 34 milionë lekësh, që iu gjet në banesë para arrestimit, ishte për kurimin e tij.
