Lulzim Basha rrëzon propozimet e kritikëve. Draft-statuti që do t?i përcillet për votim Këshillit Kombëtar të Partisë Demokratike pasditen e kësaj të premteje, nuk përfshin një ndër çështjet më të debatuara, atë për kufizimin e mandatit të kryetarit të partisë, kur ai humbet zgjedhjet.
Në dokumentin e draftuar nga grupi i punës, kryetari i Partisë Demokratike zgjidhet me 1 anëtar-1 votë nga anëtarësia dhe shkarkohet me propozimin e gjysmës së Këshillit Kombëtar dhe me miratimin e Kuvendit Kombëtar.
Një ndër kritikët e Lulzim Bashës, pjesë e grupit të punës për ndryshimet statutore, Gent Malko në platformën e tij propozonte që "kur kryetari i partisë humbet zgjedhjet, por ka rritje, mund të rikandidojë me kushtin që të marrë 2/3-at e votave të anëtarësisë, e nëse ka rënie të këtij rezultati zgjedhor atëherë të përjashtohet nga rikandidimi.?
Ndërsa sipas dy prej anëtarëve të Këshillit Kombëtar, Edit Harxhi dhe Edvin Kulluri ?nëse partia humbet në zgjedhjet parlamentare më shumë se në ato paraardhëse, apo kur kryetari humbet njëra pas tjetrës dy palë zgjedhje, ai jep dorëheqje të menjëhershme dhe nuk ka të drejtë rikandidimi.?
Nisur edhe nga kontestimi i procesit të rizgjedhjes së Bashës, kritikët kërkojnë gjithashtu edhe votëbesimin e tij në Kuvendin Kombëtar. Por asnjë prej këtyre propozimeve të bëra më herët edhe në mbledhjen e kryesisë që u shoqërua me debate nuk ka gjetur reflektim në draft-statutin që do t?i përcillet për votim Këshillit.
Mos konsultimi me forumin më të lartë të partisë për çështje që diktojnë marrëveshje politike është një tjetër propozim i bërë nga kritikët që nuk ka gjetur reflektim në draft-statut.
Për këtë çështje, Lulzim Basha, pas marrëveshjes së 18 Majit me Kryeministrin Rama u vu në qendër të akuzave, jo vetëm për anashkalim të forumeve drejtuese të partisë, por edhe për mungesë transparence.
Kritikët e tij propozojnë që çdo marrëveshje e tillë duhet të kalojë përmes vendimmarrjes së Kuvendit Kombëtar. Mos përfshirja e disa prej propozimeve të kritikëve pritet të sjellë edhe në mbledhjen e Këshillit Kombëtar debate të ashpra.
