Pronari i objektit që po ndërtohet pranë qendrën tregtare ?Mavrovasja? vazhdon të mbetet i panjohur për komunën e Çairit. Prandaj, vendimi për rrënimin e këtij objekti i është adresuar një personi të panjohur dhe rrënimi duhet të kryhet brenda 8 ditësh, duke llogaritur nga dita e nesërme. Kjo u bë e ditur nga kreu i Çairit, Visar Ganiu duke shtuar se objekti ka pasur leje ndërtimi me konstruksion hekuri dhe jo betoni.
Mundësia e tij ligjore për të ardhmen është që të parashtroj kërkesë deri te ne për kthyerjen e objektit në gjendjen e mëparshme, gjithmonë në përputhshmëri me ligjin për ndërtim. Në momentin që inspektorët në fjalë, të komunës tonë kanë dal atje, në vend ngjarje nuk ka pas asnjë nga pronarët. Nga punëtorët që kanë punuar nuk e ka marr përsipër asnjë që të evidentohet për ta pranuar njoftimin apo aktvendim që e ka lëshuar komuna jonë. Kështu që inspektorët tanë, nuk e kanë për detyrë ti identifikojnë dhe ti kërkojnë njerëzit se ku janë, ato i kanë institucionet tjera. Procesverbalin e kemi bë deri te personi i panjohur - deklaroi Visar Ganiu, Kryetar i komunës së Çairit.
Në rast se prishja nuk kryhet nga investitori i panjohur dhe brenda afatit të paraparë, këtë do e bëj komuna e Çarit. Mirëpo, sipas Ganiut, kjo do të ndodhë pasi komuna do të zgjedhë kompaninë për rrënimin e objektit.
Besoj që nga dita e hënë do të shpall edhe tenderin e ri ose shpalljen publike për rrënime të objekteve sepse e ka të skaduar. Procedurat, bashkë me ankesa që i presim është afër 40 ditë - tha Visar Ganiu, Kryetar i komunës së Çairit.
Objekti në fjalë u ndërtua në lokacion ku më parë funksiononte kafeneja ?Fontana?. Kjo e fundit u përfshi nga zjarri në muajin maj kur edhe kishte orë policore për shkak të virusit korona. Zjarri përfshiu gjithçka duke lënë vetëm konstruksionin metalik. Ndërtimi i objektit të ri filloi një muaj më vonë.
Melihate Rustemi
