याच व्हिडीओमुळे काँग्रेस प्रदेशाध्यक्ष नाना पटोले टीकेचे धनी झालेत. प्रचारावेळी बोलतानाचा हा व्हिडीओ व्हायरल झाला आणि त्यांच्यावर टीकेची झोड उठली. काँग्रेसची सत्ता असलेल्या पंजाबमध्ये पंतप्रधान मोदींच्या सुरक्षेत दिरंगाई झाल्याची घटना ताजी आहे. त्यामुळे काँग्रेसच्या मनात मोदींविषयी नेमकं काय आहे, असा सवालच भाजपने केलाय. भाजपचे खासदार सुनिल मेंढे यांनी भंडाऱ्यात नाना पटोलेंविरोधात लेखी तक्रारही दिलीय. भाजपच्या टीकेनंतर काँग्रेसनेही यावर स्पष्टीकरण दिलंय. नाना पटोले यांनीही हा खोडसाळपणा असल्याचं म्हटलंय. पंतप्रधान मोदींविषयी बोलल्यानंतर भाजप किती आक्रमक होऊ शकते ते यापूर्वीही दिसून आलंय. त्यात नाना पटोलेंचा हा व्हिडीओ म्हणजे भाजपला आयती संधीच होती असं म्हणावं लागेल. आता नाना पटोले यांनी उल्लेख केलेले ते मोदी कोण आहेत, हे एक सध्या तरी गूढच आहे.
