پلوامہ : پی ڈی پی کے سینئر لیڈر اور ایم ایل اے پلوامہ وحید الرحمان پرہ نے پلوامہ میں منعقدہ اجلاس کے حاشیے پر صحافیوں کے ساتھ گفتگو کرتے ہوئے کہا: ’’جموں وکشمیر کی نوکریاں اور زمین کے حقوق جموں وکشمیر کے لوگوں کے لیے محفوظ رکھے جانے چاہیے اور اس کے لیے کانگریس سمیت انڈیا بلاک کو نہ صرف جموں کشمیر کا ریاستی درجہ بحال کیے جانے کی مانگ کرنی چاہئے بلکہ انہیں پانچ اگست کو چھینے گئے حقوق کی واپسی کی بھی وکالت کرنی چاہئے۔‘‘
ایم ایل اے پلوامہ نے حکمران جماعت نیشنل کانفرنس کی مذمت کرتے ہوئے کہا کہ انہوں نے جموں کشمیر کا خصوصی درجہ بحال کیے جانے اور یہاں کی اراضی کی حفاظت، نوکریوں کو مقامی باشندوں کے لئے مختص رکھے جانے کے نام پر ووٹ مانگے، تاہم زمینی حقائق پر ایسا کچھ دیکھنے کو نہیں ملتا۔
