Крстосници „окупирани“ од питачи и лица кои чистат автомобили – бебиња се користат да се добие денар плус
Овие дечиња денот го поминуваат на улица, пружајќи раче низ прозорците од автомобилите кои стојат пред семафорите за да земат некој денар, а растат со помислата дека тоа е единствениот начин да се живее. Голем дел од нив ако не донесат пари, често се малтретирани и тепани, дури и од своите родители и не знаат за подобро, вели Васка Бајрамовска од канцеларијата на Народниот правобранител, одговорно лице во делот на правата и заштитата на децата. Таа објаснува дека никој не знае колку точно деца питачат, а состојбата од година во година станува поалармантна.
И од првата детска амбасада Меѓаши велат дека мора прво да се дефинира проблемот со децата на улица и конечно да се знае дали има околу 2000 дечиња кои питачат низ Скопје и државата да се погрижи тие да имаат пристап до градинка. Според еден од основачите и претседател на Првата детска амбасада во светот Меѓаши, Драги Змијанац, „да нема ниту едно дете оставено на улица“ треба да биде приоритет и на идните градоначалници, бидејќи системот мора да се постави прво на локално ниво.
И од канцеларијата на народниот правобранител и од Детската амбасада Меѓаши сметаат дека државата треба да помогне во делот на обезбедување кров над глава за социјално загрозените семејства од каде и доаѓаат децата на кои улицата им е и дом и училиште. Потоа, да се продолжи со заедничка соработка на државните институции, но и подигнување на свеста на сите граѓани за прифаќање на различностите.
